بلاول بھٹو کا اپوزیشن کو انتخابی اصلاحات کے عمل میں شامل ہونے کا مشورہ
اسلام آباد: چیئرمین پاکستان پیپلز پارٹی بلاول بھٹو زرداری نے اپوزیشن پر زور دیا ہے کہ وہ انتخابی اصلاحات کے عمل میں فعال کردار ادا کرے اور پارلیمانی کمیٹیوں میں اپنی نمائندگی یقینی بنائے۔
قومی اسمبلی کے اجلاس سے خطاب کرتے ہوئے بلاول بھٹو زرداری نے کہا کہ اگر اپوزیشن لیڈر پارلیمان کو مضبوط بنانا چاہتے ہیں تو انہیں اپنے ارکان کو متعلقہ کمیٹیوں میں شامل کرنا چاہیے۔
انہوں نے کہا کہ حکومت کو اپنی ذمہ داریاں پوری کرنی چاہئیں، تاہم اپوزیشن کو بھی پارلیمانی عمل میں مؤثر کردار ادا کرنے کی ذمہ داری قبول کرنا ہوگی۔ ان کے مطابق اپوزیشن ارکان کی فنانس کمیٹی میں عدم شرکت سے پارلیمان کمزور ہوا ہے۔
بلاول بھٹو زرداری کا کہنا تھا کہ پارلیمان مضبوط ہوگا تو تمام سیاسی جماعتیں اور ارکان بھی مضبوط ہوں گے۔ انہوں نے اپوزیشن سے درخواست کی کہ وہ اپنے پاس موجود پارلیمانی اختیار کو استعمال کرے اور قانون سازی کے عمل میں شریک ہو۔
چیئرمین پیپلز پارٹی نے انتخابی اصلاحات کے حوالے سے بات کرتے ہوئے کہا کہ اس مقصد کے لیے کمیٹی قائم کی جاتی ہے، لیکن اگر اپوزیشن اس میں شرکت نہ کرے تو اصلاحات کے عمل کو آگے بڑھانے کا فائدہ محدود ہو جاتا ہے۔
انہوں نے اپوزیشن پر زور دیا کہ وہ انتخابی اصلاحات کی کمیٹی میں شرکت کرکے پارلیمانی نظام کو مضبوط بنانے میں اپنا کردار ادا کرے۔
