بیرسٹر گوہر کا عمران خان کی بہنوں کی رہائی کا مطالبہ، خواتین کی گرفتاری پر تشویش

اسلام آباد: چیئرمین پاکستان تحریک انصاف بیرسٹر گوہر نے بانی پی ٹی آئی عمران خان کی بہنوں کی فوری رہائی کا مطالبہ کرتے ہوئے کہا ہے کہ خواتین کی گرفتاری سے سیاسی تلخی اور تناؤ میں اضافہ ہو رہا ہے۔

پارلیمنٹ ہاؤس کے باہر میڈیا سے گفتگو کرتے ہوئے بیرسٹر گوہر نے نورین بی بی کی طبیعت خراب ہونے پر تشویش کا اظہار کیا اور مطالبہ کیا کہ انہیں فوری طور پر رہا کیا جائے۔ انہوں نے بانی پی ٹی آئی کی دونوں بہنوں کی رہائی پر بھی زور دیا۔

بیرسٹر گوہر کا کہنا تھا کہ غیر سیاسی خواتین کو قید کرنا ہماری روایات کا حصہ نہیں، جبکہ خواتین کی گرفتاری سے حالات میں کشیدگی بڑھ رہی ہے۔

چیئرمین پی ٹی آئی نے مزید کہا کہ لانگ مارچ کرنا کوئی جرم نہیں ہے۔ ان کے مطابق پارٹی کی پارلیمانی جماعت کو موجودہ صورتحال پر سنجیدہ مشاورت کرنے کی ضرورت ہے۔