اسلام آباد: نائب وزیراعظم و وزیر خارجہ سینیٹر محمد اسحاق ڈار نے جمہوریہ کانگو کے صدر فیلکس انتونین تشیسکیدی تشیلومبو اور گنی بساؤ کے سابق صدر جنرل عمرو سیسوکو ایمبالو سے مشترکہ ٹیلیفونک گفتگو کی۔

گفتگو کے دوران نائب وزیراعظم اسحاق ڈار نے دونوں رہنماؤں کو پاکستان، سعودی عرب اور ترکیہ کے درمیان طے پانے والے مکہ مشترکہ دفاعی معاہدے کی تفصیلات اور اس کی اہمیت سے آگاہ کیا۔

اسحاق ڈار نے کہا کہ مکہ مشترکہ دفاعی معاہدہ اسٹریٹجک تعاون کے فروغ اور خطے میں امن، استحکام اور سلامتی کے لیے معاون ثابت ہوگا۔

پاکستان اور کانگو کے دوطرفہ تعلقات پر بھی گفتگو

نائب وزیراعظم اسحاق ڈار اور جمہوریہ کانگو کے صدر فیلکس تشیسکیدی کے درمیان پاکستان اور کانگو کے دوطرفہ تعلقات پر بھی تبادلہ خیال ہوا۔

دونوں رہنماؤں نے اعلیٰ سطح کے روابط سمیت باہمی تعاون کو مزید مضبوط بنانے کی اہمیت پر اتفاق کیا۔

اسحاق ڈار نے صدر فیلکس تشیسکیدی اور عوامِ کانگو کے لیے نیک خواہشات کا بھی اظہار کیا۔

ٹیلیفونک رابطے کے دوران باہمی دلچسپی کے امور اور دونوں ممالک کے درمیان تعلقات کو مزید وسعت دینے کے امکانات پر بھی بات چیت کی گئی۔