اسلام آباد ایکسپریس وے ایسٹ منصوبے کا جائزہ، غیر قانونی تعمیرات کے خلاف کارروائیاں تیز کرنے کی ہدایت

اسلام آباد: چیئرمین کیپیٹل ڈویلپمنٹ اتھارٹی (سی ڈی اے) سہیل اشرف نے اسلام آباد ایکسپریس وے سروس روڈ ایسٹ منصوبے کا دورہ کیا اور جاری ترقیاتی کاموں کی پیش رفت اور تعمیراتی معیار کا جائزہ لیا۔ انہوں نے متعلقہ افسران کو ہدایت کی کہ منصوبے پر کام کی رفتار تیز کرتے ہوئے اعلیٰ معیار کے ساتھ بروقت تکمیل یقینی بنائی جائے۔

یہ دورہ وفاقی وزیر داخلہ سید محسن رضا نقوی کے اسلام آباد کو جدید، خوبصورت اور ترقی یافتہ دارالحکومت بنانے کے وژن کے تحت جاری ترقیاتی سرگرمیوں کے سلسلے میں کیا گیا۔ اس موقع پر ایڈیشنل ڈپٹی کمشنر جنرل، متعلقہ اسسٹنٹ کمشنر اور سی ڈی اے کے افسران بھی موجود تھے۔

چیئرمین سی ڈی اے کو منصوبے پر ہونے والی پیش رفت، جاری تعمیراتی سرگرمیوں اور آئندہ مراحل کے بارے میں تفصیلی بریفنگ دی گئی۔ انہوں نے کہا کہ اسلام آباد ایکسپریس وے ایسٹ منصوبہ سڑکوں کے رابطوں کو بہتر بنانے، ٹریفک کی روانی میں اضافہ کرنے اور رش میں کمی لانے کے لیے اہم ہے۔ انہوں نے منظور شدہ ڈیزائن، تکنیکی تفصیلات اور تعمیراتی معیار پر سختی سے عمل کرنے، فیلڈ مانیٹرنگ اور کوالٹی کنٹرول بہتر بنانے کی ہدایت بھی کی۔

دورے کے دوران اسلام آباد ایکسپریس وے کے اطراف غیر قانونی تعمیرات، غیر مجاز تجارتی سرگرمیوں اور اراضی کے غیر منظور شدہ استعمال کے خلاف جاری انفورسمنٹ آپریشن پر بھی بریفنگ دی گئی۔ یہ کارروائیاں سی ڈی اے کے بلڈنگ کنٹرول سیکشن اور انفورسمنٹ ڈائریکٹوریٹ کی جانب سے ضلعی انتظامیہ اور اسلام آباد پولیس کے تعاون سے کی جا رہی ہیں۔

سی ڈی اے کے مطابق مجموعی طور پر 377 تعمیرات کے خلاف کارروائی کے لیے نشاندہی کی گئی ہے، جن میں 281 کمرشل تعمیرات شامل ہیں۔ اب تک 58 عمارتیں سیل کی جا چکی ہیں۔ ان میں 34 عمارتیں سوہان اقبال ٹاؤن جبکہ 24 کورنگ پل، کورنگ پولیس اسٹیشن اور گلبرگ گرینز کے علاقوں میں واقع ہیں۔ سوہان سے کھنہ پل تک مزید 124 تعمیرات کی نشاندہی کی گئی ہے جنہیں مسمار کرنے کے لیے مختص کیا گیا ہے، جبکہ مسماری کی کارروائیاں بھی جاری ہیں۔

حکام کے مطابق خلاف ورزیوں میں غیر قانونی تعمیرات، اراضی کا غیر منظور شدہ استعمال، منظوری کے بغیر تعمیرات اور فائر سیفٹی کے تقاضوں پر عمل نہ کرنا شامل ہے۔ متعلقہ مالکان اور قابضین کو نوٹسز جاری کیے گئے، جبکہ مقررہ مدت میں خلاف ورزیاں دور نہ کرنے پر کارروائی کی گئی۔

بریفنگ میں بتایا گیا کہ انفورسمنٹ آپریشن کے دوران اب تک مجموعی طور پر 25 کروڑ 5 لاکھ 90 ہزار 157 روپے وصول کیے جا چکے ہیں۔ یہ رقم اراضی کے استعمال کی تبدیلی، بغیر منظوری تعمیرات اور عمارتوں کو دوبارہ کھولنے کی فیس کی مد میں وصول کی گئی۔ مختلف کمرشل عمارتوں، پلازوں، ہسپتالوں، میرج ہالز اور دیگر املاک سے یہ ادائیگیاں موصول ہوئیں۔

سی ڈی اے کے مطابق اراضی کے استعمال کی تبدیلی، غیر قانونی تعمیرات اور سیٹ بیک، فلور ایریا ریشو (FAR) اور کورڈ ایریا سے متعلق خلاف ورزیوں کی مد میں تقریباً 3 ارب روپے مزید واجب الادا ہیں۔

چیئرمین سی ڈی اے سہیل اشرف نے متعلقہ شعبوں کو ہدایت کی کہ بلڈنگ کنٹرول، اراضی کے استعمال اور فائر سیفٹی سے متعلق قواعد پر سختی اور یکساں انداز میں عمل درآمد یقینی بنایا جائے۔ انہوں نے کہا کہ غیر قانونی تعمیرات اور غیر منظور شدہ سرگرمیوں کو اسلام آباد کی منصوبہ بند ترقی اور عوامی تحفظ میں رکاوٹ نہیں بننے دیا جائے گا۔

سی ڈی اے کی پریس ریلیز کے مطابق شہریوں اور مسافروں نے شہر میں ترقیاتی منصوبوں، ٹریفک مینجمنٹ، بنیادی ڈھانچے کی بہتری اور بلڈنگ ضوابط پر عمل درآمد کی کوششوں کو سراہا۔ چیئرمین سی ڈی اے نے اس عزم کا اظہار کیا کہ ترقیاتی کاموں کی رفتار تیز کرنے، تعمیراتی معیار برقرار رکھنے اور شہریوں کو بہتر سہولیات فراہم کرنے کے لیے اقدامات جاری رکھے جائیں گے۔