ترجمان ڈی آئی جی آپریشنز کے مطابق پولیس نے کارروائی کرتے ہوئے چوری اور نقب زنی کی وارداتوں میں مبینہ طور پر ملوث ملزم مہتاب اور اس کے رشتہ دار عبدالرحمان کو جھنگ سے گرفتار کرلیا۔

ترجمان کے مطابق گرفتار ملزم مہتاب کے خلاف چوری اور نقب زنی کے 18 مقدمات درج ہیں، جبکہ ملزم پر رواں سال اپریل میں کراچی کے علاقے صدر میں 22 کروڑ روپے کی چوری میں ملوث ہونے کا بھی الزام ہے۔

پولیس کے مطابق دونوں ملزمان جھنگ، فیصل آباد اور رحیم یار خان میں بھی چوری کی مختلف وارداتوں میں مبینہ طور پر ملوث رہے ہیں۔

ترجمان کا کہنا ہے کہ گرفتار ملزم عبدالرحمان کے قبضے سے 9 ایم ایم پستول اور گولیاں برآمد کرلی گئی ہیں۔

پولیس نے مزید بتایا کہ ملزمان کے قبضے سے اسلام آباد کے تھانہ رمنا میں درج چوری کے مقدمے کا مسروقہ سامان بھی برآمد کرلیا گیا ہے۔

پولیس کے مطابق ملزمان سے مزید تفتیش جاری ہے جبکہ ان کے خلاف قانونی کارروائی عمل میں لائی جا رہی ہے۔