جہلم (شہزاد بٹ): ڈپٹی کمشنر جہلم میر رضا اوزگن نے متعلقہ محکموں کے افسران کو ہدایت کی ہے کہ ضلع بھر میں جاری ترقیاتی منصوبوں پر کام کی رفتار تیز کی جائے، تعمیراتی معیار برقرار رکھا جائے اور تمام منصوبوں کو مقررہ مدت میں مکمل کرنے کے لیے مؤثر اقدامات کیے جائیں۔
ترقیاتی منصوبوں کی پیش رفت کا جائزہ لینے کے لیے ڈپٹی کمشنر میر رضا اوزگن کی زیرِ صدارت ضلعی ترقیاتی کمیٹی کا اجلاس منعقد ہوا، جس میں ضلع بھر میں جاری ترقیاتی پروگراموں اور منصوبوں پر عمل درآمد کی صورتحال کا جائزہ لیا گیا۔
اجلاس میں متعلقہ محکموں کے افسران اور سیاسی شخصیات نے شرکت کی۔ اس موقع پر ضلع میں جاری ترقیاتی کاموں، عوامی ضروریات اور منصوبوں کی بروقت تکمیل سے متعلق امور پر تبادلہ خیال کیا گیا۔
اجلاس کے دوران منصوبوں پر ہونے والی پیش رفت، مقررہ اہداف کے حصول، تعمیراتی کام کے معیار اور تکمیل میں درپیش مسائل کا جائزہ لیا گیا۔ متعلقہ افسران نے جاری منصوبوں کے بارے میں بریفنگ دی، جبکہ سیاسی شخصیات نے مقامی سطح پر عوامی ضروریات اور مزید ترقیاتی کاموں سے متعلق امور کی نشاندہی کی۔
ڈپٹی کمشنر جہلم میر رضا اوزگن نے ہدایت کی کہ ترقیاتی منصوبوں کی باقاعدہ نگرانی کی جائے اور کام میں غیر ضروری تاخیر سے گریز کیا جائے۔ انہوں نے واضح کیا کہ منصوبوں کی رفتار بڑھانے کے ساتھ ان کے معیار کو برقرار رکھنا بھی ضروری ہے۔
انہوں نے مزید کہا کہ متعلقہ اداروں کے درمیان مؤثر رابطہ کاری کے ذریعے ترقیاتی سرگرمیوں کو بہتر بنایا جائے تاکہ شہریوں کو بنیادی اور عوامی سہولیات کی فراہمی یقینی بنائی جا سکے۔
اجلاس میں اس بات پر زور دیا گیا کہ ترقیاتی منصوبوں کی بروقت تکمیل، مؤثر نگرانی اور محکموں کے باہمی تعاون سے ضلع جہلم میں عوامی فلاح و بہبود کے اقدامات کو آگے بڑھایا جائے۔
