راولپنڈی: دریائے سواں میں 28 سالہ خاتون کے ڈوبنے کا افسوسناک واقعہ پیش آیا ہے، جس کے بعد پولیس نے واقعے کی مختلف پہلوؤں سے تحقیقات شروع کردی ہیں۔

پولیس ذرائع کے مطابق جاں بحق ہونے والی خاتون کی شناخت کومل جان کے نام سے ہوئی ہے، جو الیکشن کمیشن آف پاکستان میں اسسٹنٹ کے طور پر کام کرتی تھیں اور سوشل میڈیا پر بھی متحرک تھیں۔ وہ ہیوی بائیک رائیڈنگ سے متعلق ویڈیوز بھی بناتی تھیں۔

ابتدائی اطلاعات کے مطابق خاتون واقعے کے روز ہیوی بائیک پر نجی ہاؤسنگ سوسائٹی پہنچی تھیں۔ پولیس کو ایک کالر کی جانب سے اطلاع دی گئی کہ خاتون نے پل سے دریا میں چھلانگ لگائی، تاہم پولیس نے اس دعوے کو حتمی قرار نہیں دیا۔

پولیس حکام ٹک ٹاک یا سوشل میڈیا کے لیے ویڈیو بنانے کے دوران حادثاتی طور پر دریا میں گرنے سمیت مختلف پہلوؤں سے تحقیقات کر رہے ہیں۔ خاتون کا موبائل فون بھی ان کے ہینڈ بیگ سے ملا، جو موٹر سائیکل کے قریب موجود تھا۔

پولیس کے مطابق واقعے کے ممکنہ عینی شاہدین اور ابتدائی اطلاع دینے والے شخص کی تلاش بھی کی گئی، جبکہ پوسٹ مارٹم کے بعد خاتون کی لاش ورثا کے حوالے کردی گئی ہے۔ پولیس کا کہنا ہے کہ پوسٹ مارٹم رپورٹ موت کی اصل وجہ جاننے میں مدد دے گی۔

پولیس نے واقعے کو خودکشی قرار دینے کے بجائے تمام ممکنہ پہلوؤں سے تحقیقات جاری رکھنے کا فیصلہ کیا ہے۔

نوٹ: ابتدائی خبر میں ریسکیو ٹیموں کی جانب سے تلاش جاری ہونے کی اطلاع تھی، تاہم بعد کی پولیس معلومات کے مطابق خاتون کی لاش مل چکی ہے اور ورثا کے حوالے کردی گئی ہے