سوات: وادی کالام کی بلند ترین چوٹی فلک سر پر 54 روز سے جاری مشکل ریسکیو آپریشن بالآخر کامیابی سے مکمل کر لیا گیا۔ ریسکیو ٹیم نے کوہ پیما سید علی شاہ میاں کی میت تقریباً 5 ہزار 200 میٹر کی بلندی سے برآمد کرلی۔

سید علی شاہ میاں 11 جولائی کو فلک سر کی چوٹی سر کرنے کے بعد واپسی کے دوران پہاڑ پر حادثے کا شکار ہوئے تھے، جس کے نتیجے میں وہ جاں بحق ہوگئے۔ کئی روز تک جاری رہنے والی تلاش کے بعد ان کی میت بلند پہاڑی مقام پر موجود ہونے کا سراغ ملا۔

ریسکیو ٹیم نے دشوار گزار علاقے اور شدید موسمی حالات کے باوجود کارروائی جاری رکھی اور بالآخر میت کو بیس کیمپ تک منتقل کرنے میں کامیابی حاصل کرلی۔

ذرائع کے مطابق خراب موسم کے باعث ہیلی کاپٹر کے ذریعے میت کو منتقل کرنا ممکن نہیں، جس کے بعد ریسکیو اہلکار پیدل ہی اسے کالام تک پہنچانے کی کوشش کر رہے ہیں۔

ریسکیو آپریشن کے دوران ٹیم کو شدید سردی، دشوار گزار راستوں اور بلند ترین پہاڑی علاقے سمیت متعدد مشکلات کا سامنا رہا، تاہم اہلکاروں نے مسلسل کوششیں جاری رکھتے ہوئے 54 روز بعد لاپتہ کوہ پیما کی میت تلاش کرلی۔

طویل انتظار کے بعد میت کی برآمدگی سے اہل خانہ کو اپنے پیارے کی آخری رسومات ادا کرنے کا موقع مل سکے گا، جبکہ ریسکیو ٹیم کی جانب سے میت کو محفوظ طریقے سے کالام منتقل کرنے کی کوشش جاری ہے۔