کراچی کے تاجر میر رضا کی ہلاکت کے کیس میں نئی تفتیشی ٹیم کے ارکان، میر رضا کے والدین اور وکیل جبران ناصر نے جائے وقوعہ کا دورہ کیا۔

میر رضا کے والد میر حسین نے کہا کہ 13 روز بعد پہلی بار محسوس ہو رہا ہے کہ تحقیقات درست سمت میں آگے بڑھ رہی ہیں۔ ان کے مطابق اگر ابتدا ہی میں مؤثر تحقیقات کی جاتیں تو کیس آج مختلف مرحلے میں ہوتا، تاہم اب بھی یہ واضح نہیں ہوسکا کہ میر رضا کے ساتھ اصل میں کیا ہوا۔

میر حسین کا کہنا تھا کہ نئی تفتیشی ٹیم خاندان کی تمام باتیں سن رہی ہے اور انہیں ٹیم پر اعتماد ہے۔ انہوں نے بتایا کہ تین مشکوک افراد سے متعلق معلومات پولیس کو پہلے ہی فراہم کی جاچکی ہیں۔

انہوں نے مزید کہا کہ سابق تفتیشی ٹیم نے خاندان کے ساتھ تحقیقات شیئر نہیں کیں، تاہم امید ہے کہ نئی ٹیم کیس کو منطقی انجام تک پہنچائے گی۔

دوسری جانب وکیل جبران ناصر نے کہا کہ خاندان نے اپنی مدد آپ کے تحت اہم مقامات کی نشاندہی کرکے پولیس کو وہاں لے جایا۔ ان کے مطابق میر رضا کے والدین تحقیقات میں پولیس سے مکمل تعاون کر رہے ہیں۔

جبران ناصر نے بتایا کہ قبر کشائی کے بعد حاصل کیے گئے نمونے فرانزک لیبارٹری بھجوا دیے گئے ہیں جبکہ پوسٹ مارٹم کے دوران حاصل ہونے والے نمونوں کی رپورٹ کا بھی انتظار ہے۔

اہم: کیس کی حتمی وجوہات اور حقائق فرانزک و پوسٹ مارٹم رپورٹس سامنے آنے کے بعد مزید واضح ہوں گے۔