گلگت بلتستان کے نوجوانوں کے لیے 7 ارب روپے مختص، سیاحت اور مہمان نوازی میں اسکالرشپ پروگرام پر زور

گلگت بلتستان: وزیراعلیٰ گلگت بلتستان امجد حسین نے کہا ہے کہ نوجوانوں کو معیاری تعلیم، پیشہ ورانہ تربیت اور روزگار کے بہتر مواقع فراہم کرنا حکومت کی اہم ترجیحات میں شامل ہے۔ انہوں نے بتایا کہ یوتھ ڈویلپمنٹ پروگرام کے تحت بجٹ میں 7 ارب روپے مختص کیے گئے ہیں۔

قراقرم انٹرنیشنل یونیورسٹی کے ہنزہ کیمپس کے دورے کے موقع پر طلبہ، اساتذہ اور سول سوسائٹی کے نمائندوں سے گفتگو کرتے ہوئے وزیراعلیٰ نے سیاحت اور مہمان نوازی کے شعبوں میں اسکالرشپ پروگرام کے اجرا کو اہم قدم قرار دیا۔ ان کا کہنا تھا کہ اس اقدام سے نوجوانوں کو پیشہ ورانہ مہارتیں حاصل کرنے اور روزگار کے مواقع بڑھانے میں مدد مل سکتی ہے۔

امجد حسین نے کہا کہ گلگت بلتستان میں سیاحت سمیت مختلف شعبوں میں ترقی کے وسیع امکانات موجود ہیں۔ علاقے کے قدرتی وسائل کو بہتر انداز میں استعمال کرنے اور عالمی سطح پر سیاحت کو فروغ دینے کے لیے مؤثر اقدامات کی ضرورت ہے۔

انہوں نے کہا کہ دنیا بھر سے آنے والے سیاحوں کو بہترین مہمان نوازی فراہم کرنا اور مقامی سیاحتی مقامات کو مزید بہتر بنانا حکومت کی ذمہ داریوں میں شامل ہے۔ سیاحت اور مہمان نوازی سے متعلق تربیت نوجوانوں کے لیے معاشی ترقی کے نئے راستے کھول سکتی ہے۔

وزیراعلیٰ نے نوجوانوں کی صلاحیتوں پر اعتماد کا اظہار کرتے ہوئے کہا کہ نوجوان ملک اور علاقے کا مستقبل ہیں۔ حکومت کی کوشش ہے کہ تعلیم، تربیت اور ترقی کے مواقع نوجوانوں کو ان کی دہلیز پر میسر آئیں، تاکہ وہ اپنی صلاحیتوں کو بروئے کار لا کر گلگت بلتستان اور پاکستان کا نام روشن کرسکیں۔

طلبہ سے خطاب کرتے ہوئے انہوں نے حصولِ علم کو اولین ترجیح دینے پر زور دیا۔ ان کا کہنا تھا کہ نوجوان محنت، لگن اور وقت کے مؤثر استعمال کے ذریعے تعلیمی میدان میں کامیابی حاصل کرسکتے ہیں اور عملی زندگی میں نمایاں مقام بنا سکتے ہیں۔

امجد حسین نے مزید کہا کہ حکومت نوجوانوں کے مسائل ترجیحی بنیادوں پر حل کرنے اور ان کے لیے ترقی کے مواقع پیدا کرنے کے لیے دستیاب وسائل استعمال کرے گی۔ ان کے مطابق یوتھ ڈویلپمنٹ پروگرام کے تحت مختص کیے گئے 7